خبير اقتصادي يواجه نواف سلام بعد مجزرة الفجوة المالية: “لا تتحوّل إلى حسان دياب”!
كتب الباحث في الشؤون المالية والاقتصادية البروفيسور مارون خاطر على حسابه عبر منصة “فيسبوك”:
“دولة الرئيس سلام، بتأسَّف إنك تكون ما سمعت شو جرَّبنا نوصلَّك كلّ هالأسبوع وإنو يكون ردَّك هوّي التجاهل والإصرار.
مؤسف هالمؤتمر الصحفي بتوقيتو وبمشهديتو.
مشروع قانون الفَجوة الماليَّة متل ما تسرَّب سيئ كتير وتبعاته على الإقتصاد وعلى القطاع المصرفي وعلى المودعين رح تكون مدمِّرة.
أنا وكتار من زملائي لي عم يجرّبوا يعلّو الصوت ما إلنا مصلحة غير إنو لبنان يكون أفضل وإنو ولادنا يعيشوا أحسن مما نحنا عشنا.
نحنا درسنا إقتصاد ومال قد ما دولتك درست قانون كرمال هَيك منِسمح لَحالنا نحكي.
العهد الجديد وحكومتك هني فرصة حقيقية للبنان وما بدنا تضيع.
إصرارك على تمرير هيدا المشروع ما بيشبه إصرارك على تثبيت سيادة الدَّولة لي كلّنا معك فيا.
هون المسألة مسألة أختصاص مش مسألة مبدأ بس.
لي كانوا حولك إنت وعم تصرِّح مش كلّن عنّا ثقة فيهن قد ما عنّا ثقة فيك.
هيدا المشروع ما فيك تعمل بعدو محاسبة، المحاسبة بدا تكون بالتزامن معو.
اللي اشتغلوا على المسودِّة وعلى التسريب ما بدّن مُحاسبة متل ما إنت بدَّك، بدّن عفا الله عمّا مَضى ونسيان وإنجازات وهميّة.
النّاس فكَّروا إنو رح ترجع الودائع لأنو كلامك عنّا هو كلام ثقة.
بس هالمرَّة للأسف في ناس عم يستعملوا مكانتك بقلوب اللبنانيين ليبيّضو صفحتن ويسطروا إنجازات.
الهدف هوي استعادة الثقة بالبلد وبالقطاع المصرفي مش إدارة التفليسة.
بتمنّى عليك تسحب هالمشروع وتسمع رأي الناس لي بتحب لبنان متلك وبتحبك.
الحل توزيع عادل ومحاسبة متزامنة بالدولة والمركزي والمصارف وغير هيك ظلم إنت ما بتقبل في.
ما بدنا إصرارك لي دخَّلك على قلوبنا بالسياسة يحوّلك لـ “حسان دياب” تاني بالاقتصاد.
أنا بناشد فخامة الرئيس وبناشدك إنو تسحبوا هالمشروع وتعدّلوا لتكون مقاربتكن بالاقتصاد شجاعة وإصلاحية وبتشبه الإنجازات لي عم تحققوها بالسياسة”.
مواضيع ذات صلة :
 البيطار ينهي استجواب دياب في ملف انفجار مرفأ بيروت |  البيطار يبدأ استجواب حسان دياب في ملف انفجار المرفأ |  الرئيس برّي استقبل دياب والمدعي العام التمييزي وأبرق إلى الفاتيكان معزيًا |
