زياد نجّار: دفعت الثمن بس لأني لبناني.. ومروان نجّار كان كلّه للوطن!

بهالحلقة من برنامج “ما بتقطع” مع رنا أسطيح، بيفتح المخرج والممثل اللبناني زياد نجّار قلبه ودفاتر ذكرياته وبيسترجع محطات من مشواره الفني ومسيرة والده الكاتب الكبير مروان نجّار وبيتحدّث عن أهمية إحياء إرثه الفني وعن أصداء عرض تسجيل مصوّر لوحدة من أجمل مسرحياته “عريسين مدري وين” اللي استقبلها الجمهور بحفاوة كبيرة بعد أكتر من 20 سنة على عرضها لأوّل مرّة.

زياد نجّار بيمرّ بهالحلقة على أرشيف وذاكرة كبيرة ما بين المسرح والملجأ والفن اللي بيصمد وبيستمرّ تحت القصف ورغم العنف ليكون رسالة وعي ومصدر أمان وإلهام لكتار، وبيتحدّث عن أمسية “عذرنا يا وطن” اللي تشاركها مع هادي زكاك وأنجو ريحان وفؤاد يمين ليقدّم قراءة جديدة لكلمات النشيد الوطني اللبناني اللي بيشوف فيها خشبة خلاص لأبناء الوطن.

وعن مسرحية “عدو الشعب” اللي سبق وقدّمها مع المخرج لوسيان أبو رجيلي بيحكي زياد نجّار عن العدو الأوّل للشعب وبيكشف كيف مسرحية تمّ أخدها عن نص انكتب بالنمسا من أكتر من 200 سنة قدرت تعكس الواقع اللبناني اليوم.

أما عن مسرحية “وعيتي” فبيقول إنو سكب فيها مشاعر وأفكار عمرها أكتر من 20 سنة بهدف التركيز على أهمية التفكير الإيجابي بوجّ المآسي والمعاناة.

رسائل صريحة ومباشرة بيوجّهها المخرج اللبناني بهالحلقة لفنانين متل جوليا قصار، نادين لبكي، غبريال يمين وغيرن وبيتحدّث لأوّل مرّة عن الأسباب الحقيقية لابتعاده عن البلد لأكتر من 15 سنة وسبب عودته وعن مصير أعمال ما أبصرت النور للكاتب الراحل مروان نجّار.