جوزيان بولس: قبلة خوليو إغليسياس.. أسرار Mono Awards وأوّل مسرح للمكفوفين بلبنان!
مديرة مسرح مونو الممثلة والكاتبة والمخرجة والمنتجة اللبنانية جوزيان بولس بحلقة مختلفة من برنامج ما بتقطع مع الإعلامية رنا أسطيح بحوار صريح وعفوي عن كواليس ما انحكى قبل عن المونو وعن كيف قدرت ترجع النبض لهالمسرح العريق وتقدّم 57 مسرحية من أيلول لأيلول وتفتح أبوابه من جديد قدّام الجمهور العريض.
بهالحلقة بتكشف شو أكتر شي عم يطلبه الجمهور اليوم وليش اختارت إنّو الكوميديا تكون أساس البرمجة الجديدة وبتحكي عن تجربة عروض أنجو ريحان وكتابات يحيى جابر وعن المسرحيات اللي عملت أعلى حضور مثل “مجدرة حمرا” “كذبة بالصينية” و”طربوش جدي معلّق” وليش قالتلها رنا: “إنتِ خاربة الدني”.
وبتمرق على أسماء كثيرة تركت بصمة على خشبة المونو من أنجو ريحان وجنيد زين الدين ومروى خليل، زينة مكي، رودريك سليمان، وسام صليبا، فؤاد يمين، سينتيا كرم وغيرن وصولاً للعروض الكوميدية البحتة لحسين قاووق وكوكو ماك ماك وبتحكي عن رحلاتها إلى بغداد وقرطاج لتمثيل لبنان برّا وبتتوقف عند خصوصية تجربة جورج خباز المسرحية اللي قدرت تجذب الناس للمسرح على مدى سنين.
وبتحكي كيف بتختار الأعمال وبتقول: “المسرح للجمهور مش لإلي أنا ما بنقي المسرحية هي اللي بتنقي حالها”. وبتكشف كيف قدر شخص لا يُبصر يحضر مسرحية كاملة عبر تقنية الوصف الصوتي للمكفوفين بتجربة هي الأولى من نوعها على صعيد المسارح في لبنان والشرق الأوسط وكيف فتح هالإنجاز باب جديد لوصول المسرح لكل الناس بلا استثناء. كما بتحكي عن إطلاق Mono Awards قريباً وشو قصة اللجان السرية والمنافسة على الجوائز.
وبتروي قصة ما انحكت قبل مع المغنّي العالمي خوليو إغليسياس من لحظة البوسة للموقف الطريف اللي صار وبتكشفه لأول مرة. وبتحكي عن والدها جان كلود بولس أحد روّاد الإعلام في لبنان ومؤسسي تلفزيون لبنان وكيف كان من أوائل الوجوه اللي ظهرت على الشاشة وعن الشارع اللي تسمّى باسمه.
كما بتكشف عن موسم الأعياد بالمونو: شو قصة مسرحية “شو كارلوس أحسن مني؟ وشو العمل المسرحي الجديد مع الممثلة جوي كرم؟ وبتعلن عن مسرحية جديدة رح تنعرض بشهر آذار من كتابة ألكسندر نجار وإخراج لينا أبيض بتجمع 9 ممثلين على الخشبة.
وبتجاوب على سؤال: شو الشي اللي ما لازم يقطع بالمسرح؟ وبتكسر تابوهات عن الزواج والطلاق والتنمر وبتسترجع إصابتها بالحرب وكيف تركت أثر كبير بحياتها ومسيرتها.
حلقة مليانة صراحة وأسرار وضحك مع مديرة مسرح مونو جوزيان بولس عبر منصة هنا لبنان.
