اعترافات أمين درّة الأقوى: أسرار ثنائية نادين وظافر العابدين، صدمة دريد لحام.. وبالآخر “حقي رصاصة”!!
حلقة مش عادية من برنامج ما بتقطع مع المخرج اللبناني أمين درّة اللي بيسترجع أهم محطات مشواره الحافل بالنجاحات والجوائز العالمية اللي حصدها عن سلسلة من الأعمال الدرامية والسينمائية كانت سابقة زمنها وقدرت تحقق ملايين المشاهدات بالعالم. بهالحلقة بيكشف أمين درّة لأوّل مرّة عن تفاصيل خاصّة عن مسلسل ممكن للنجمين نادين نجيم وظافر العابدين وبيردّ على موجة التكهنات اللي رافقت تأجيل عرض المسلسل.
بيحكي عن الشراكات الإبداعية اللي طبعت مشواره، عن خصوصية التعاون مع اسم متل جورج خبّاز بأنجح الأعمال من فيلم غدي لمسلسل براندو الشرق
وبهالحوار بيحكي أمين درة عن هواجس وأحلام السينمائيين اللبنانيين، تحدّيات صناعة الصورة، وكيف بتساهم الأعمال التمثيلية بنقل قصص الناس الملهمة والحقيقية. وبيشارك لحظات مفصلية من مشواره الإنساني والمهني ليسترجع محطات تحدّى فيها الرفض، واجه منظومة ما كانت تعطي الأولوية للحكاية والنص وقدر يخلق أنماط جديدة من الأعمال الدرامية استشرفت زمن المنصات والسوشال ميديا متل سلسلة شنكبوت اللي فاز عنها بجايزة إيمي الدولية وسلسلة بدون قيد اللي كسرت الأرقام القياسية بنسب المشاهدة والتحميل.
شو الـ “لأ” الكبيرة اللي سمعها بحياته وليش ما بينسى الموقف اللي جمعه مع النجم دريد لحام؟ شو هي الأعمال المحددة اللي دخل فيها عالم إخراج الفيديو كليب؟ وشو خصوصية التعاون مع نجمة متل أصالة نصري؟ وشو الموقف المرعب اللي عاشه وقال عنه بمرارة “اكتشفت إنو حقي رصاصة”؟ كيف تحدّى الظروف الإنتاجية والمعادلات الفنية المفروضة وصنع أعمال قدرت تخاطب الشباب وتجذب ملايين المشاهدات وشو التحدّي الجديد اللي عم بيخوضه على الساحة الدرامية من خلال مسلسل ممكن بشراكة مستمرّة مع شركة الصبّاح ؟
كل هالأسئلة وغيرها الكتير بيجاوب عليها أمين درة بحوار صادق وصريح وبشفافية كبيرة بهالحلقة الاستثنائية من برنامج ما بتقطع من إعداد وتقديم رنا أسطيح.
